Hōsanna

CumMk 11,1–11 Hierosolymae appropinquārent, ad montem Olīvārum Iēsūs duōs discipulōs mittit: “Īte in castellum quod contrā vōs est; ibi invenietis pullum ligātum, super quem nēmō adhūc sēdit. Solvite eum et addūcite. Et sī quis dīxerit: Quid facitis? — respondēte: Dominō necessārius est.” Abeuntēs pullum inveniunt ligātum ante iānuam et solvunt. Quīdam adstantēs rogant: “Quid facitis?” Illī, sīcut Iēsūs praecēperat, respondent; et dīmittuntur. Pullum ad Iēsum addūcunt, vestīmenta sua super eum sternunt, et Iēsūs īnsidet. Multī quoque vestīmenta in viā sternunt, aliī frondēs ex arboribus caedunt. Et quī praeībant et quī sequēbantur clāmābant: “Hōsanna! Benedictus quī venit in nōmine Dominī!” Ita Iēsūs Hierosolyma et templum intrat; sed, cum iam vespera esset, in Bēthaniam cum Duodecim exit.

appropinquō -āre prope accēdō
castellum -ī (n) oppidum parvum, vīcus
pullus -ī (m) equī aut asinī fīlius
ligō -āre vinciō, fūne teneō
solvō -ere vincula laxō, līberō
adstō -āre prope stō, adsum
sternō -ere humī expandō