Adulēscēns Dīves

IndeMk 10,1–12 Iēsūs in fīnēs Iūdaeae trāns Iordānem venit; iterum turbae ad eum conveniunt, et ille, sīcut solēbat, eōs docet. Accēdunt Pharisaeī et, eum temptantēs, rogant: “Licetne virō uxōrem dīmittere?” Iēsūs respondet: “Quid vōbīs Mōsēs praecēpit?” “Mōsēs,” inquiunt, “permīsit libellum repudiī scrībere et dīmittere.” Sed Iēsūs: “Propter dūritiam cordis vestrī hoc scrīpsit. Ab initiō autem Deus masculum et fēminam fēcit. Propter hoc relinquet homō patrem et mātrem et uxōrī suae adhaerēbit, et erunt duo in carne ūnā. Quod ergō Deus iūnxit, homō nōn sēparet.”

• soleō -ēre cōnsuēscō, mōrem habeō
• uxor -ōris (f) fēmina virō nūpta
• dīmittō -ere ā sē abīre sinō, repudiō
• libellus -ī (m) parva scrīptūra, charta
• repudium -ī (n) mātrimōniī dissolūtiō
• dūritia -ae (f) dūrus animus, obstinātiō
• masculus -ī (m) vir, mās