Ex Corde

PharisaeīMk 7,1–13 et quīdam scrībae, quī ab Hierosolymīs vēnerant, ad Iēsum conveniunt. Cum vidērent discipulōs commūnibus manibus — id est nōn lōtīs — pānem mandūcāre, eōs vituperant. Iūdaeī enim, trāditiōnem seniōrum tenentēs, nōn mandūcant nisi prius manūs lāvērunt. Itaque Iēsum interrogant: “Quārē discipulī tuī iuxtā trāditiōnem seniōrum nōn ambulant?” Ille respondet: “Bene dē vōbīs, hypocritae, Isaīās prophētāvit: hic populus mē labiīs honōrat, sed cor eōrum longē ā mē abest. Vōs enim, mandātum Deī relinquentēs, trāditiōnem hominum tenētis.”

• commūnis -e pollūtus, nōn pūrus
• lōtus -a -um aquā mundātus
• vituperō -āre culpō, reprehendō
• trāditiō -ōnis (f) mōs ā maiōribus trāditus
• senior -ōris (m) vir aetāte prōvectus
• iuxtā secundum, propter
• hypocrita -ae (m) simulātor, quī fingit