Umbrae

Via ad Acherontem dūcit — flūmen prīmum mortuōrum, turbidum caenō vāstāque vorāgine (tuum verbum!) aestuāns. Et in rīpā — PORTITOR. Quid est portitor? Portitor est quī hominēs flūmen trānsvehit, nauta trāiciēns: CHARŌN, horrendus squālōre, cui plūrima mentō cānitiēs inculta iacet, stant lūmina flammā; sordidus ex umerīs nōdō dēpendet amictus. Ipse ratem contō subigit vēlīsque ministrat, et ferrūgineā subvectat corpora cymbā — iam senior, sed crūda deō viridisque senectūs (deī etiam senēscunt — sed virent!). Quid est cymba? Cymba est parva nāvis, scapha: cymba Charōntis omnēs mortālēs exspectat. Ad hunc — TURBA ruēbat: mātrēs atque virī, dēfūnctaque corpora vītā magnanimum hērōum, puerī innūptaeque puellae, impositīque rogīs iuvenēs ANTE ŌRA PARENTUM (agnōscisne dolōrem? “ante ōra patrum” — ō quotiēns iam!). Et similitūdō — inter pulcherrimās omnium: