Arachnē

Trītōnia — sīc Minerva vocātur — carminibus Mūsārum aurēs praebuerat, et īram eārum iūstam probāverat: rēctē pīcae factae sunt! Tum sēcum: “laudāre parum est: laudēmur et ipsae — nec spernī sine poenā nostra nūmina sināmus!” Laudāre aliōs parum est: ipsa laudārī vult. Et animum ad fāta ARACHNĒS intendit — puellae Maeoniae, quam sibi laudibus artis lānificae nōn cēdere audīverat: lānificus est quī lānam facit; ars lānifica est ars texendī, quam apud sorōrēs Minyēidās vīdistī. Sed audī, quis haec puella fuerit — nam mīrāberis: