Iter in Galliam

Hieme mediā parvum agmen per Alpēs ascendit. Quid est agmen? Agmen est exercitus in viā, mīlitēs in ōrdine euntēs — sed hoc agmen parvum est, vix comitātus Caesaris. Nix alta viās tegit; ventus frīgidus ex montibus flat; mūlī tardē prōcēdunt. In mediō agmine vehiculum it, et in vehiculō sedet Iūliānus — legēns. Etiam hīc, inter nivēs, librōs Eusēbiae apertōs tenet. Quid legit? Fortasse dē bellō iam legit: nam animō mīles fierī discit, antequam corpore fīat.

• agmen -inis (n) exercitus in viā iēns
• mūlus -ī (m) animal quod onera portat
• tardē lentē, nōn celeriter
• prōcēdō -ere prōgredior
• flō -āre (ventus) moveor