Aquilifer Fortis

At barbarī, cōnsiliō Rōmānōrum cognitō, praemissō equitātū et essedāriīs — quō genere in proeliīs ūtī cōnsuērunt — nostrōs nāvibus ēgredī prohibēbant. Quid est essedārius? Essedārius est quī ex currū bellicō pugnat; dē hīs mox plūra vidēbis. Erat summa difficultās: nāvēs propter magnitūdinem nisi in altō cōnstituī nōn poterant; mīlitibus autem — ignōtīs locīs, impedītīs manibus, magnō et gravī onere armōrum oppressīs — simul et dē nāvibus dēsiliendum et in flūctibus cōnsistendum et cum hostibus erat pugnandum! Illī autem aut ex āridō aut paulum in aquam prōgressī, omnibus membrīs expedītīs, nōtissimīs locīs, audācter tēla coniciēbant. Quid est āridum? Āridum est terra sicca. Nostrī perterritī — atque huius omnīnō generis pugnae imperītī — nōn eādem alacritāte quā in pedestribus proeliīs ūtēbantur. Legiōnēs Rōmānae in undīs haesitant.

• essedārius -ī (m) quī ex currū pugnat
• altum -ī (n) mare procul ā terrā
• āridum -ī (n) terra sicca
• haesitō -āre dubitō, incertus sum
• alacritāte (alacritās) studiō magnō et laetō
• ūtēbantur rēs iīs in ūsū erant