Britannia Ignōta

Exiguā parte aestātis reliquā, Caesar — etsī in hīs locīs mātūrae sunt hiemēs — tamen in Britanniam proficīscī contendit! Tandem, lēctor: īnsula illa, quam iam totiēns nōmināvimus, ipsa adītur. Cūr? Quod omnibus ferē Gallicīs bellīs hostibus nostrīs inde subministrāta auxilia intellegēbat. Et sī tempus annī ad bellum gerendum dēficeret, tamen magnō sibi ūsuī fore arbitrābātur, sī modo īnsulam adiisset, genus hominum perspexisset, loca, portūs, aditūs cognōvisset — quae omnia ferē Gallīs erant incognita! Neque enim temere praeter mercātōrēs illō adit quisquam. Itaque, vocātīs ad sē undique mercātōribus, Caesar quaerēbat: quanta est īnsulae magnitūdō? quae nātiōnēs incolunt? quem ūsum bellī habent? quī portūs? — Nihil reperīre poterat. Aut nesciēbant mercātōrēs… aut tacēbant. Terra vēre ignōta.

• exiguus -a -um parvus
• subministrō -āre occultē praebeō
• incognitus -a -um nōn nōtus
• temere sine causā, facile
• ūsum (ūsus) ūsus bellī = scientia ex multīs proeliīs