Rēx Superbus

Caesar Gallōrum animōs verbīs cōnfirmat: “Mihi ea rēs cūrae erit. Magnam spem habeō Ariovistum fīnem iniūriīs factūrum.” Quid est cūrae esse? Cūrae esse est in animō dīligenter habērī. Sed cūr Caesar hanc rem suscipit? Multae causae sunt. Prīma: Haeduī frātrēs cōnsanguineīque populī Rōmānī saepe appellātī sunt — eōs in servitūte Germānōrum vidēre turpissimum est. Quid est turpis? Turpis est contrārium honestī. Secunda causa: sī Germānī cōnsuēscent Rhēnum trānsīre, mox in prōvinciam — deinde in Ītaliam ipsam — venient, sīcut ōlim Cimbrī Teutonīque! Tertia causa: Ariovistus tantōs sibi spīritūs sūmpsit ut ferendus nōn videātur. Quid sunt spīritūs? Spīritūs hōc locō sunt superbia, arrogantia.

• suscipiō -ere in mē recipiō
• cōnsanguineus -ī (m) eiusdem sanguinis
• turpis -e contrārium honestī
• spīritūs -uum (m pl) superbia magna