Lacrimae Galliae

Bellō Helvētiōrum cōnfectō, rēs mīra fit: tōtīus ferē Galliae lēgātī, prīncipēs cīvitātum, ad Caesarem grātulātum conveniunt. Quid est grātulārī? Grātulārī est gaudium dē victōriā alterīus verbīs ostendere. Prīncipēs dīcunt: “Caesar, victōria tua nōn sōlum populō Rōmānō sed etiam nōbīs prōdest!” Quid est prōdesse? Prōdesse est ūtile esse, adiuvāre. Deinde petunt ut concilium tōtīus Galliae convocāre liceat. Caesar permittit.

• cōnficiō -ere ad fīnem dūcō
• grātulor -ārī gaudium dē victōriā ostendō
• prōsum, prōdesse ūtilis sum
• concilium -ī (n) conventus prīncipum