Via Angusta

AdhūcMt 7,1–5 Iēsūs in monte docet, et nunc ad fīnem sermōnis venit. Prīmum dē iūdiciō monet. “Nōlīte iūdicāre,” inquit, “nē iūdicēminī.” Quid est iūdicāre? Iūdicāre est dē aliō sententiam ferre, id est dīcere: “alter malus est.” Sī tū frātrem iūdicās, Deus quoque tē iūdicat. Nōlī ergō alium iūdicāre, nē tū quoque iūdicēris. Cūr aliēna vitia tam facile vidēmus, nostra nōn vidēmus? Quid est festūca? Festūca est rēs parva, minima pars strāminis. Quid est trabs? Trabs nōn est rēs parva sed magnum lignum. Iēsūs rem imāgine ostendit: festūcam in oculō frātris cōnspicis, sed trabem in oculō tuō nōn sentīs! Ēice prius trabem dē oculō tuō; tunc rēctē vidēbis ut festūcam frātris ēiciās.

fīnis -is (m) extrēma pars, terminus
iūdicium -ī (n) sententia dē aliō lāta
iūdicō -āre sententiam ferō
aliēnus -a -um alterīus, nōn meus
vitium -ī (n) culpa, dēfectus
festūca -ae (f) minima pars strāminis
trabs, trabis (f) magnum lignum
ēiciō -ere forās iaciō, expellō