Essedae

Dum ea geruntur, legiōne ex cōnsuētūdine ūnā frūmentātum missā — quae appellābātur septima — neque ūllā ad id tempus bellī suspīciōne interpositā, cum pars hominum in agrīs remanēret, pars etiam in castra ventitāret: iī quī prō portīs castrōrum in statiōne erant Caesarī nūntiāvērunt pulverem maiōrem quam cōnsuētūdō ferret in eā parte vidērī quam in partem legiō iter fēcisset! Quid est frūmentārī? Frūmentārī est frūmentum ex agrīs petere. Caesar id quod erat suspicātus — aliquid novī ā barbarīs initum cōnsiliī — cohortēs sēcum in eam partem proficīscī, reliquās armārī et cōnfestim subsequī iussit. Quid est cōnfestim? Cōnfestim est statim, sine morā.

• frūmentor -ārī frūmentum ex agrīs petō
• suspīciō -ōnis (f) timor occultī malī
• cōnfestim statim
• messōriīs falx messōria = falx quā frūmentum metimus