Fidēs Frācta
Hīs dē rēbus Caesar certior factus īnfirmitātem Gallōrum veritus est — nam sunt in cōnsiliīs capiendīs mōbilēs et novīs plērumque rēbus student. Et audī mōrem Gallicum, quem Caesar ipse dēscrīpsit: viātōrēs etiam invītōs cōnsistere cōgunt, et quid quisque dē quāque rē audierit quaerunt; mercātōrēs in oppidīs vulgus circumsistit: “Ex quibus regiōnibus venīs? Quās rēs ibi cognōvistī?” Quid est viātor? Viātor est quī iter facit. Hīs rūmōribus permōtī, dē summīs saepe rēbus cōnsilia ineunt — quōrum eōs in vestīgiō paenitet: nam incertīs rūmōribus serviunt, et plērīque ad voluntātem eōrum ficta respondent! Quid est fictus? Fictus est falsus, fabricātus. Gēns nūntiōrum avida facile dēcipitur.
- īnfirmitās -ātis (f) animus nōn firmus
- viātor -ōris (m) quī iter facit
- paenitet mē dolōrem factī sentiō
- fictus -a -um falsus
- veritus quī timet, timōre mōtus