Ubi Frūmentum?

Exercitus magnus multum frūmentum cōnsūmit. Quid est cōnsūmere? Cōnsūmere est edendō fīnīre. Quīnque legiōnēs cotīdiē edunt — mīlia et mīlia hominum! Unde frūmentum venit? Haeduī frūmentum prōmīserant. Quid est prōmittere? Prōmittere est dīcere “dabō.” Sed frūmentum nōn venit. Caesar Haeduōs cotīdiē flāgitat. Quid est flāgitāre? Flāgitāre est vehementer et iterum iterumque poscere.

• cōnsūmō -ere tōtum sūmō, fīniō
• edō, ēsse cibum capiō
• prōmittō -ere dīcō “dabō”
• flāgitō -āre magnā vōce poscō