Resurrēctiō

CumMk 16,1–8 sabbatum trānsiisset, Maria Magdalēnē et Maria Iacōbī et Salōmē arōmata ēmērunt, ut venientēs corpus Iēsū unguerent. Valdē māne, prīmā sabbatī, ortō iam sōle, ad monumentum veniunt. Inter sē dīcēbant: “Quis nōbīs lapidem ab ōstiō revolvet?” Sed respicientēs vident lapidem iam revolūtum — erat enim magnus valdē. Ingressae monumentum, iuvenem vident ad dextram sedentem, stolā candidā coopertum; et obstupuērunt. Ille dīcit: “Nōlīte expavēscere! Iēsum quaeritis Nāzarēnum crucifīxum: surrēxit, nōn est hīc. Ecce locus ubi eum posuērunt. Sed īte, dīcite discipulīs eius et Petrō: Praecēdit vōs in Galilaeam; ibi eum vidēbitis.” At illae fugiunt dē monumentō; invāserat enim eās tremor et pavor.

arōma -atis (n) herba odōrāta, unguentum
unguō -ere oleō perfundō
orior -īrī (sōl) surgit, exorītur
monumentum -ī (n) sepulcrum, tumulus
revolvō -ere retrō volvō, āmoveō
respiciō -ere retrō spectō
iuvenis -is (m) homō aetāte flōrēns