Fuga ad Rhēnum

Eōdem diē Ariovistus castra prōmōvet et mīlibus passuum sex ā castrīs Caesaris sub monte cōnsīdit. Postrīdiē — audāciam incrēdibilem! — praeter castra Caesaris suās cōpiās trādūcit et mīlibus passuum duōbus ultrā eum castra facit. Quō cōnsiliō? Ut frūmentō commeātūque, quī ex Sēquanīs et Haeduīs supportābātur, Caesarem interclūderet! Quid est interclūdere? Interclūdere est viam claudere. Rēx barbarus etiam artem bellī scit: exercitus sine frūmentō diū pugnāre nōn potest. Ex eō diē quīnque diēs continuōs Caesar prō castrīs suās cōpiās prōdūcit et aciem īnstrūctam habet: “Sī vīs proeliō contendere — potestās nōn deest!” Ariovistus exercitum castrīs continet.

• prōmoveō -ēre ante moveō
• commeātus -ūs (m) rēs necessāriae exercituī
• continuus -a -um sine intermissiōne